Թագաժահրը
Անհամբեր եմ դպրոցները սկսելու: Արդէն իսկ դասագիրքերս ապահոված եմ նոր տարեշրջանի մը համար եւ վերամուտը կը սպասեմ: Բայց ամէն մարդ կ՛ըսէ որ նորէն շատցած է անպիտան «Քորոնան»: Չեմ ուզեր այսպէս անցնել օրերս առանց դպրոցի եւ դասընկերներուս:
Ուրբաթ՝ 28 Փետրուար, 2020ին երբ դպրոցէն վերադարձանք բնաւ մեր մտքէն չէր անցներ որ դպրոցական վերջին օրը պիտի ըլլար եւ Երկուշաբթի օր պիտի չկարենայինք դպրոց վերադառնալ: Շուարած էինք այս անակնկալ արձակուրդէն, ի՞նչ կը նշանակէր դպրոց չերթալ եւ տունը մնալ: Չկրցանք դասընկերներով իրարու մնաք բարով ըսել, որովհետեւ մեր դպրոցի կարգ մը աշակերտները գիշերօթիկ բաժնի մէջ կը մնային եւ արդէն իսկ Պէյրութ, Զահլէ կամ Դամասկոս գացին: Մենք սովորութիւն ունէինք նոյնիսկ նոր տարուայ կամ զատկուայ կարճ արձակուրդներուն իրարու լաւ մաղթանքներ ըսել եւ այդպէս բաժնուիլ:
Բայց այս անգամ տարբեր էր: Այս անակնկալ «արձակուրդը» երկար տեւեց, հակառակ որ այս օրերուն հաղորդակցութեան միջոցները շատ աւելի դիւրիւն են: Շատ կարօտցած եմ դասընկերներուս եւ ուսուցիչներուս որոնց հետ շատ հաճելի ժամանակ կ՛անցընէինք:
Այս անբնական արձակուրդին ընթացքին կրցայ տեսաերիզ դիտել, աւելի երկար ժամանակ քնանալ, հեծանիւ քշել, ձեռագործ աշխատիլ եւ քիչ մըն ալ թաղի ընկերուհիներուս հետ ժամանակ անցնել: Անշուշտ մօրս ալ կ՛օգնեմ երբեմն: Յաճախ օրուան ընթացքին կը յիշեմ դասընկերուհիներս եւ դասընկերներս որոնք տարբեր տեղեր կը գտնուին: Ինչպէ՞ս կ՛անցնեն իրենց ժամանակը:
Մաղթանքս եւ աղօթքս է որ շուտով տեսնեմ բոլորին: Ունենանք ապահով եւ հաճելի նոր դպրոցական տարեշրջան մը հեռու փորձանքներէ եւ անապահով վիճակներէ: Ամէն մարդ իր բնական կեանքին վերադառնայ եւ մարդիկ ապրին ուրախ եւ երջանիկ:
Արգինա Աբէլեան
