Գալիլ նանան 100 տարեկան
Գալիլ նանան Սեպտեմբեր 2007-ին իր 100 տարին բոլորեց: Անշուշտ ան իր այդ յառաջացած տարիքին կը վայելէ լաւ առողջութիւն, մտքի կայտառութիւն, պայծառ յիշողութիւն:
Գալիլիա Եարալեան-Մանճիկեան ծնած է 1907, Գարատուրանէն դէպի ծով Եարալեան թաղը: Մայրը՝ Եղիսաբէթ, հայրը Մովսէս: Գալիլ նանան լաւ կը յիշէ 1915-ի «Մահաճրլըքի»՝ տեղահանութեան սեւ օրերը, երբ իր ամբողջ ընտանիքին հետ համագիւղացիներու ճակատագրին կ՚ենթարկուին ու գաղթի ճամբան կը բռնեն դէպի Համա, Հոմս, Դամասկոս, ուրկէ կը քշուին Փոր Սայիտ (Եգիպտոս)։1920-ին կը վերադառնան Դամասկոս, ետքը Հալէպ, Անտիոք եւ վերջապէս իր սրտին կարօտը յագեցուցած իր Քեսապ վերադարձը: Գալիլ նանան ամուսնացած է Յովհաննէս Մինաս Մանճիկեանի հետ, ունենալով 7 զաւակներ, որոնցմէ 3-ը միայն կ’ապրին. Աստղիկը, Անահիտը եւ Յակոբը: Ան հիմա իր աղջկան Աստղիկին սիրայօժար հոգատարութիւնը կը վայելէ, իսկ մօտաւոր ու հեռաւոր թոռներու գուրգուրանքն ու սէրը: